Futbol üzrə Azərbaycan millisi “Avro-2024”ün seçmə mərhələsinin ikinci turunda İsveç yığmasının qonağı olub.

Senzor.az bildirir ki, Stokholm şəhərindəki “Friends Arena”da  fransalı qadın baş hakim Stefani Frapparın idarə etdiyi matçda hesabı İsveç millisi açıb. 38-ci dəqiqədə Emil Forsberq adını tabloya yazdırıb. Görüşün ilk hissəsi İsveç seçməsinin minimal üstünlüyü ilə yekunlaşıb – 1:0.

İkinci hissədə millimizin müdafiəçisi Bəhlul Mustafazadə avtoqol müəllifi olub. Qarşılaşmanın 65-ci dəqiqəsində futbolçumuz topu öz qapımızdan keçirib. Matçın 79-cu dəqiqəsində Viktor Dyekereş, 88-ci dəqiqədə Yesper Karlsson futbolçularımızı meydanın mərkəzinə dəvət ediblər. Matçda son nöqtəni 89-cu dəqiqədə isveçli futbolçu Antoni Elanqa qoyub və komandasının böyük hesablı qələbəsinə imza atıb.

Beləliklə, görüş İsveç yığmasının 5:0 hesablı qələbəsi ilə başa çatıb.

Xatırladaq ki, F qrupunun ilk turunda Azərbaycan millisi səfərdə Avstriya yığmasına 1:4 hesabı ilə uduzmuşdu. 

Millimiz növbəti oyununu iyunun 17-də doğma meydanda Estoniya seçməsinə qarşı keçirəcək.