Danışıqlar nəticəsində 94-ə yaxın rusiyalı hərbçi Ukrayna əsirliyindən geri qaytarılıb. Onlar müalicə və reabilitasiya üçün tibb müəssisələrinə çatdırılacaq.
Senzor.az bildirir ki, bu barədə Rusiya Müdafiə Nazirliyi məlumat yayıb.
"İyunun 11-də danışıqlar prosesi nəticəsində əsirlikdə ölüm təhlükəsi ilə üzləşmiş 94 rusiyalı hərbçi Kiyev rejiminin nəzarətində olan ərazidən geri qaytarılıb”, - məlumatda deyilir.
Eyni zamanda Rusiya əsirliyində olan Ukrayna Silahlı Qüvvələrinin daha bir qrup döyüşçüsü də qarşı tərəfə qaytarılıb.
Ukrayna Prezidenti Aparatının rəhbəri Andrey Yermak “Telegram”da yazıb ki, iyunun 11-də Ukrayna Rusiya Federasiyası ilə əsir mübadiləsi çərçivəsində 95 müdafiəçini vətənə qaytarıb. Onların arasında 2 zabit, 93 sıravi və çavuş var.
Onun sözlərinə görə, Mariupoldan, Çernobıl AES-dən, İlan adasından, Baxmutdan əsir düşənlər, həmçinin “Azovstal”ın müdafiəçiləri vətənə qayıdıblar.
