Gürcüstanın eks-prezidenti Mixail Saakaşvilinin tərəfdarları Tbilisidə parlament binası qarşısına toplaşaraq ona dəstək üçün növbəti aksiya keçirirlər."RİA Novosti" xəbər verir ki, hazırda parlamentə bitişik Rustaveli prospektinə patrul polis briqadaları səfərbər edilib.
Aksiyanın təşkilatçıları Vahid Milli Hərəkat müxalifət partiyasının üzvləridir. Etirazçıların əsas tələbləri Saakaşvilinin həbsxana xəstəxanasından mülki klinikaya köçürülməsi, azadlığa buraxılması və növbədənkənar parlament seçkilərinin təyin edilməsidir.
Senzor.az xatırladır ki, M.Saakaşvili Tbilisidə oktyabrın 1-də saxlanılıb və Rustavidəki 12 saylı həbsxanaya yerləşdirilib. Noyabrın 8-də isə Tbilisinin 18 saylı Qldani cəzaçəkmə müəssisəsinin xəstəxanasına köçürülüb. Köçürülmə prosesində o, ciddi mənəvi və fiziki zorakılığa məruz qalıb. Bunu əks etdirən görüntülər sosial şəbəkələrdə yayılandan sonra dəstək aksiyalarına qoşulanların sayı daha da artıb.
