Pxenyanla münasibətlərdə problemlərin həlli üçün Şimali Koreya lideri Kim Çen Inla danışıqların aparılması zəruridir.
Yerli KİV xəbər verir ki, Yaponiyanın Baş naziri Fumio Kişida bunu parlamentdəki çıxışı zamanı deyib.
“KXDR ilə bağlı müxtəlif problemlərin həlli üçün Kim Çen In ilə danışıqlar aparmaq lazımdır. Bu məsələ mənim şəxsi nəzarətim altında yüksək səviyyədə araşdırılır”, - deyə Fumio Kişida bildirib.
Yaponiyanın hökumət başçısı Tokio-Pxenyan münasibətlərindəki problemlər arasında KXDR-in raket və nüvə proqramlarının inkişafını və Yaponiya vətəndaşlarının qaçırılmasını qeyd edib.
Fumio Kişida Kim Çen Inla şəxsən görüşməyə hazır olduğunu dəfələrlə bəyan edib. Cənubi Koreya mediasının yaydığı məlumatına görə, 2023-cü ilin iyununda KXDR və Yaponiya nümayəndələri qaçırılan yaponiyalıların məsələsini müzakirə etmək üçün üçüncü ölkələrdə ən azı iki görüş keçiriblər.
