Los-Ancelesin (Kaliforniya ştatı) mərkəzində davam edən etirazlar və iğtişaşlarla əlaqədar komendant saatı tətbiq edilir.
Senzor.az bildirir ki, bu barədə şəhərin meri Karen Bass mətbuat konfransında məlumat verib.
“Fox News” telekanalının yayımladığı çıxışında o deyib: “Vandalizm və qarətçiliyə son qoymaq üçün Los-Ancelesin mərkəzində komendant saatı tətbiq edirəm. Əgər Los-Ancelesin mərkəzində yaşamır və işləmirsinizsə, bu ərazidən uzaq durun. Hüquq-mühafizə orqanları komendant saatını pozanları saxlayacaq”.
Mer qeyd edib ki, məhdudiyyətlər çərşənbə axşamı yerli vaxtla saat 20:00-da (Bakı vaxtı ilə 07:00) qüvvəyə minəcək və çərşənbə günü saat 06:00-a (Bakı vaxtı ilə 17:00) qədər qüvvədə olacaq.
Qeyd edək ki, iğtişaşlar iyunun 7-də ABŞ İmmiqrasiya və Gömrük Nəzarəti Xidmətinin (ICE) Los-Ancelesin mərkəzində keçirdiyi reyddən sonra başlayıb, burada qanunsuz miqrantların aşkarlanması üzrə kütləvi əməliyyat keçirilib. Ağ Ev şəhərə Milli Qvardiyanın 2 min əsgərinin yeridildiyini elan edib.
