Serbiya Prezidenti Aleksandar Vuçiç Rusiyanın Ukraynadakı hərəkətlərini pisləyən Ukrayna-Cənub-Şərqi Avropa sammitinin yekun bəyanatını imzalamaqdan imtina edib.
Publika.az xəbər verir ki, bütün digər forum iştirakçıları bəyannaməni imzalayıblar.
Vuçiç qərarını sənəddə Moskvaya qarşı sanksiyaların tətbiqi tələbinin olması ilə izah edib. Siyasətçi heç kimin ona təzyiq etmədiyini də vurğulayıb. Onun sözlərinə görə, sammitin digər iştirakçıları “Rusiyaya qarşı yönəlmiş hər şeyi, bacardıqları hər şeyi qəbul etməyə hazırdırlar”.
Ukrayna-Cənub-Şərqi Avropa formatı Kiyev və Balkan yarımadası ölkələri arasında çoxtərəfli dialoq üçün platformadır.
İyunun 11-də Serbiya Prezidenti müharibə başlayandan bəri ilk dəfə Odessada keçirilən sammitdə iştirak etmək üçün Ukraynaya bir günlük səfərə gedib.
Vuçiç bildirib ki, Serbiya Kiyevə öz dəstəyini vermək üçün Ukraynanın bir və ya iki şəhərini və ya kiçik bir bölgəsini bərpa edəcək.
“Mən sizdən (Ukrayna Prezidenti Volodimir Zelenskidən) bərpa edə biləcəyimiz bir və ya iki şəhər və ya kiçik bir bölgə seçmək üçün dəstəyinizi istəyirəm”, - Vuçiç bildirib.
Serbiya Prezidenti qeyd edib ki, Azərbaycan da artıq oxşar işlər görüb və bu, humanitar yardımdan və onun sözlərinə görə, ərazi bütövlüyünə siyasi dəstəkdən ibarət digər məsələlərə gəldikdə çox vacib olacaq.
