İyunun 28-nə keçən gecə ruslar kamikadze dronlarla Odessaya hücum ediblər.
Senzor.az Ukrayna Milli Polisinin Teleqram səhifəsinə istinadən bildirir ki, hücum nəticəsində 2 nəfər həlak olub, 14 nəfər xəsarət alıb.
Yaşayış binalarına, inzibati binaya və digər mülki infrastruktura, avtomobillərə ziyan dəyib.
Məlumata görə, bütün yanğınlar Dövlət Fövqəladə Hallar Xidmətinin əməkdaşları tərəfindən söndürülüb. Təəssüf ki, ər və arvad ölüb və onların meyitləri yaşayış binasının dağıntıları altından çıxarılıb. Xəsarət alanlardan 2-si polis, 3-ü isə azyaşlı uşaqdır.
Ölən və xəsarət alanların dəqiq sayı və dağıntının miqyası ilə bağlı məlumatlar dəqiqləşdirilir.
"Hadisə yerində polis və digər ixtisaslaşdırılmış xidmətlər işləyir. Hüquq-mühafizə orqanlarının əməkdaşları hücumun nəticələrini qeydə alır, sübutlar toplayır, vətəndaşları dindirir, psixoloji yardım göstərir, asayişi təmin edirlər. Bu tapşırıqların yerinə yetirilməsi üçün 66 polis əməkdaşı xidmət göstərir", - deyə məlumatda vurğulanıb.
