Xocalının Meşəli kəndində 25 azərbaycanlını öldürən, 14 nəfəri yaralayan, 358 nəfəri öz yurdundan didərgin salan erməni cəlladlarından Xaçaturyan Vaqif Çerkezoviçin Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistana getmək istəyərkən Laçın sərhəd-keçid məntəqəsində saxlanılması barədə artıq məlumatınız var.
Bu şəxsin kimliyi barədə Azərbaycanın əlində yetəri qədər məlumat var və onun Xocalıda azərbaycanlılara qarşı törətdiyi dəhşətli cinayət faktları barədə informasiya kifayət qədərdir. Laçın postundan məsum görkəmli Vaqif Xaçaturyanın aradan çıxmaq cəhdi baş tutmadı. Təbii olaraq Qarabağdan Ermənistana keçmək istəyərkən qorxu içində olduğu aydın sezilirdi. Çünki bilirdi ki, Azərbaycanın müvafiq dövlət instansiyalarında onun 30 il əvvəlki cinayətləri barədə məlumatlar mövcuddur. Lakin görünür, Xaçaturyan bir gün etdiklərinin cəzasını çəkəcəyi o vaxtın bu qədər yaxın olduğunu düşünməmişdi.
Azərbaycanın əlində Xaçaturyan vəhşiliyi, vandallığı, genosidi barədə elə materiallar mövcuddur ki, bu, rəsmi Bakıya imkan verir ki, Azərbaycanın Cinayət Məcəlləsinə uyğun şəkildə əli yüzlərlə günahsız insanın qanına batan Xaçaturyan və onun kimilərə layiqli cəzanı kəssin.
Xaçaturyanın silsilə cinayətləri sırasından yayılan bir videoda, demək olar, hər şey açıq-aydın ortaya çıxır. Belə ki, 2001-ci ildə lentə alınan videoda erməni əsirliyindən xilas olan azərbaycanlı Mail Məmmədov adlı şəxs erməni silahlıları tərəfindən məruz qaldığı işgəncələr barədə başına gətirilən və şahidi olduğu çox dəhşətli, tükürpədici hadisələrdən bəhs edir.
İşgəncə verənlərin də adını qeyd edən Mail, həmin şəxslərdən birinin adının Vaqif olduğunu bildirir. Artıq hər şey ortada. Söhbət elə ötən gün Laçın Sərhəd Buraxılış Məntəqəsində Qarabağdan Ermənistana qaçmaq istəyərkən ələ keçən Vaqif Xaçaturyandan gedir.
Mail bildirir ki, Xaçaturyan və onun "silahdaşları" azərbaycanlı əsirləri yerə yıxıb başlarını əzirdilər, xaç və digər işarəli dəmir parçalarını qızdırıb əsirlərimizin bədənlərinin müxtəlif nahiyyələrinə basırlarmış. Bunlar sadəcə sözügedən Xocalı qatilinin törətdiyi vəhşiliklərdən bir şəzsin şahidi olduğu məqamlardır.
Laçın postunda saxlanılan Xocalı qatili Vaqif Xaçaturyan 1996-1997-ci ilərdə separatçıların qondarma “müdafiə naziri” Samvel Babayanın sürücüsü olub. Birinci Qarabağ müharibəsində azərbaycanlılara qarşı soyqırımılarda birlikdə iştirak ediblər, daha sonra Babayan “nazir” olanda onu özünün sürücüsü təyin edib.
İstisna edilmir ki, Azərbaycanın əlində hazırda Qarabağda qalmış Xaçaturyan kimi cinayətkarların, əlləri günahsız azərbaycanlıların qanına batmış, soydaşlarımıza qarşı qətliamların iştirakçısı olmuş erməni silahlılarının sırasında fəaliyyət göstərmiş və yaxud göstərənlərin adının daxil edildiyi siyahı var. Böyük ehtimalla onları da yaxın gələcəkdə Xaçaturyanın aqibəti gözləyir.
Konkret desək, erməni separatçıları sərhəddə Xaçaturyanın həbsi hadisəsindən özləri bu nəticələri çıxarmalıdırlar:
- Torpaqlarımızın işğalında və qətliamlarda iştirak edənlərin Laçından Ermənistana keçidi qeyri-mümkündür, belələrin sayı isə az deyil.
- Separatçılar silahları təhvil verməyənə qədər olduqları yerdə qapanıblar, bu halda onlarla bağlı amnistiya da mümkün deyil.
Təəssüflər olsun ki, bu hadisə eyni zamanda bir məsələni yenidən aktuallaşdırmış olur. Söhbət Beynəlxalq Qırmızı Xaç Komitəsinin Xaçaturyanı xəstə qiyafəsində Ermənistana qaçmaqda yardımçı olmasıdır. BQXK-nın müharibə cinayətkarlarına kömək etməsi və ədalətdən gizlətməsi heç də yeni xəbər deyil. 2011-ci ilin mayında İngiltərənin "The Guardian" nəşrində İkinci Dünya müharibəsindən sonra BQXK-nın minlərlə nasist cinayətkarına və əməkdaşına gizlənməyə necə kömək etdiyi barədə qalmaqallı məqalə də dərc olunmuşdu.
Lakin Ermənistan və onun havadarları, ermənipərəst dairələr bir şeyi bilməlidirlər ki, nəinki Beynəlxalq Qırmızı Xaç Komitəsi, heç onlar da azərbaycanlıların ölümündə günahkar olanları, azərbaycanlılara qarşı qətliamlar, soyqrımlar törədənləri bundan sonra xilas edə bilməyəcəklər.
Xocalı soyqrımını törədənlərdən biri – Vaqif Xaçaturyan Laçın postunda saxlanılması və onun bundan sonra edəcəyi etirafları digər qatillərin ifşa olunması, bu soyqırımın tanıdılması baxımından da olduqca böyük əhəmiyyətə malikdir. Bu hadisə həm də Xocalı qatillərinin hamısının bir gün məhkəmə qarşısında cavab verəcəyi inamını bir qədər də artırmış oldu. Necə deyərlər, qisasımız qiyamətə qalmayacaq.(Trend)
