Azərbaycan Respublikasının İnsan hüquqları üzrə müvəkkili (ombudsman) Səbinə Əliyevanın dəvəti əsasında ölkəmizdə rəsmi səfərdə olan İslam Əməkdaşlığı Təşkilatının Müstəqil Daimi İnsan Hüquqları Komissiyasının (İƏT MDİHK) sədri Muhammad Laval Sulaimanın rəhbərlik etdiyi nümayəndə heyəti Füzulidə Ombudsman Aparatının əməkdaşları ilə birgə faktaraşdırıcı missiya həyata keçirib. Faktaraşdırıcı missiyanın əsas məqsədi işğaldan azad edilmiş və raket hücumlarına məruz qalmış Azərbaycan ərazilərində dini-mədəni abidələrin, azərbaycanlılara məxsus qəbiristanlıqların dağıdılması faktlarının yerində araşdırılması və nəticələrə əsasən hesabat hazırlayaraq beynəlxalq ictimaiyyətə təqdim edilməsidir.
Senzor.az xəbər verir ki, nümayəndə heyəti Füzulidə Ermənistan silahlı qüvvələri tərəfindən işğal dövründə dağıdılmış yaşayış binalarına, mülki obyektlərə, dini, mədəni və tarixi abidələrə baxış keçirib, monitorinqini aparıblar. Əvvəlcə Qaraxanbəyli kəndi ərazisində Azərbaycan Respublikası Prezidentinin xüsusi nümayəndəliyinin əməkdaşı tərəfindən qonaqlara ermənilərin işğal zamanı törətdikləri vəhşiliklə bağlı məlumat verilib. Onlar burada erməni vandalizminə məruz qalmış kənd qəbiristanlığı ilə tanış olublar.
Sonra Merdinli kəndinə gələn nümayəndə heyətinə 30 illik işğal dövründə ermənilərin ölkəmizə qarşı törətdikləri cinayətlər barədə ətraflı məlumat verilib. Bildirilib ki, erməni vandalları işğal etdikləri şəhər və kəndlər kimi Merdinli kəndini də talayıb, yer üzündən siliblər. Bütün evlər, sosial obyektlər dağıdılıb, təsərrüfatlar məhv edilib. Düşmən Merdinli kəndindəki məsciddən mal-qara tövləsi kimi istifadə etməklə, azərbaycanlılara qarşı öz nifrətlərini nümayiş etdiriblər
Füzuli Beynəlxalq Hava Limanında nümayəndə heyətinə işğaldan azad edilmiş ərazilərdə həyata keçirilən bərpa-quruculuq işləri, infrastruktur layihələri haqqında məlumat verilib. Bildirilib ki, işğaldan azad edilən torpaqlarda Azərbaycan tərəfindən irimiqyaslı layihələr həyata keçirilir, tikinti-quruculuq işləri aparılır. Belə layihələrdən biri də Füzuli, Zəngilan və Laçın Hava limanlarının inşasıdır. Artıq Füzuli və Zəngilan Beynəlxalq Hava limanlarının inşası başa çatıb. Burada görülən bütün işlər beynəlxalq norma və standartlara uyğun şəkildə həyata keçirilib.
Nümayəndə heyəti Füzuli şəhərinin mərkəzində də erməni vəhşiliyinin şahidi olub. Bildirilib ki, şəhər tamamilə viran edilib, yaşayış binaları ilə bərabər, tarixi-mədəni abidələr də dağıntılara məruz qalıb.
Nümayəndə heyəti, həmçinin Füzuli şəhərində yeni yaşayış məhəlləsində və Mirzə Uluqbəy adına 1 nömrəli tam orta məktəbdə də olub. Onlar, həmçinin Ermənistanın işğalı nəticəsində zərərçəkmiş Füzuli şəhərinin sakinləri ilə görüşüblər.
Füzulidə faktaraşdırıcı missiya həyata keçirən İƏT-in Müstəqil Daimi İnsan Hüquqları Komissiyasının nümayəndə heyəti Ağdama yola düşüb.
**14:59
İƏT MDİHK nümayəndə heyətinin işğaldan azad edilmiş Füzuli rayonunda dağıdılmış məsciddə olublar.
Trend xəbər verir ki, Ombudsman aparatın əməkdaşları və İƏT MDİHK nümayəndə heyəti Füzuli rayonun Merdinli kəndindəki məsciddə olublar.
Qonaqlara məlumat verilib ki, Merdinli kəndindəki məsciddən düşmən mal-qara tövləsi kimi istifadə edib. Erməni vandalları işğal dövründə kəndi talayıb, yer üzündən siliblər.
Bütün evlər, sosial obyektlər dağıdılıb, təsərrüfatlar məhv edilib.
**12:43
Ombudsman və İƏT MDİHK nümayəndə heyəti ilk olaraq işğaldan azad edilmiş Füzuli şəhərinə səfər ediblər.
Yerli KİV xəbər verir ki, səfərdə Ombudsman aparatının əməkdaşları və ölkəmizə səfər edən İslam Əməkdaşlıq Təşkilatı Müstəqil Daimi İnsan Hüquqları Komissiyası (İƏT MDİHK) nümayəndə heyəti iştirak edir. Səfər zamanı işğaldan azad edilmiş Füzuli rayonunda dağıdılmış dini obyektlərin və qəbiristanlıqların monitorinqi, yenidənqurma işləri ilə tanış olacaqlar və keçmiş məcburi köçkünlərlə görüş keçirilməsi nəzərdə tutulub.
Səfərin əsas məqsədi Ermənistan tərəfindən dini-mədəni abidələrin, azərbaycanlılara məxsus qəbiristanlıqların dağıdılması faktlarının yerində araşdırılması, işğal və raket hücumları nəticəsində zərər çəkmiş azərbaycanlılarla bağlı məlumatların toplanması və nəticələrə əsasən hesabat hazırlayaraq beynəlxalq ictimaiyyətə təqdim edilməsindən ibarətdir.
Faktaraşdırıcı missiya həyata keçirəcək İƏT MDİHK nümayəndə heyətinin üzvləri İslam Əməkdaşlıq Təşkilatı Müstəqil Daimi İnsan Hüquqları Komissiyasının (İƏT MDİHK) sədri Muhammad Laval Sulaiman (Nigeriya), İƏT MDİHK sədr müavini Hacı Ali Açıkgül (Türkiyə) İƏT MDİHK üzvü Hilal bin Said al Şidhani (Oman), İƏT MDİHK katibliyinin icraçı direktoru Nura Zaid Alrşoud (Səudiyyə Ərəbistanı), İƏT MDİHK Katibliyinin direktoru Javed Saqlain (Pakistan), İƏT MDİHK Katibliyinin əməkdaşı İbrahima Saidou Kamaradır (Qvineya).
Qeyd edək ki, sentyabrın 6-na kimi ölkəmizdə səfərdə olacaq nümayəndə heyəti Ağdam, Füzuli rayonlarında və Gəncə şəhərində faktaraşdırıcı missiya keçirəcəklər
