Gürcüstanın altıncı Prezidenti Mixail Kavelaşvilinin andiçmə mərasimi başa çatıb.
Senzor.az yerli KİV-ə istinadən bildirir ki, mərasimin rəsmi hissəsi parlamentin plenar zalında keçirilib. M.Kavelaşvili Gürcüstan Konstitusiyasına and içib.
"Mən, Gürcüstan Prezidenti, Allah və xalq qarşısında Gürcüstanın Konstitusiyasını, ölkənin müstəqilliyini, bütövlüyünü və bölünməzliyini qoruyacağıma, prezidentin vəzifələrini vicdanla yerinə yetirəcəyimə, ölkəmin vətəndaşlarının təhlükəsizliyi və rifahının, xalqımın və Vətənimin dirçəlişi və qüdrətinin qayğısına qalacağıma and içirəm", - o bildirib.
M.Kavelaşvili xüsusi olaraq çap edilmiş və parlamentin muzeyində saxlanılacaq konstitusiya nüsxəsinə and içib. Həmin nüsxə hər dəfə dövlət başçısının andiçmə mərasimi zamanı istifadə olunacaq.
**09:50
Bu gün Gürcüstanın altıncı Prezidenti Mixail Kavelaşvilinin andiçmə mərasimi keçiriləcək.
Senzor.az yerli KİV-ə istinadən bildirir ki, saat 11:00-da başlayacaq mərasim parlamentin plenar zalında baş tutacaq.
Artıq Kavelaşvilini prezident seçmiş 300 seçicinin hamısına, o cümlədən deputatlara, Gürcü Pravoslav Kilsəsinin nümayəndələrinə, Konstitusiya və Ali Məhkəmələrin rəhbərlərinə, Mərkəzi Seçki Komissiyasına, Acarıstan hökumətinin başçısı Tornike Rijvadzeyə, hökumət üzvləri ilə yanaşı digər rəsmi şəxslərə dəvət göndərilib.
Xarici dövlətlərin Gürcüstanda akkreditə olunmuş səfirləri andiçmə mərasimində iştirak etməyəcəklər. İnauqurasiyaya Kavelaşvili ailəsinin üzvləri dəvət olunub.
Bu günə qədər parlament Kavelaşvilinin and içəcəyi Gürcüstan Konstitusiyasının xüsusi nüsxəsini çap edib. Konstitusiyanın bu nüsxəsi Parlament Muzeyində saxlanılacaq. O, hər dəfə dövlət başçısının andiçmə mərasimində istifadə olunacaq. Bütün mərasimin 40 dəqiqə ilə 1 saat arasında davam edəcəyi gözlənilir.
Gürcüstan Konstitusiyasına görə, Kavelaşvili and içdikdən sonra o, öz hüquq və səlahiyyətlərini rəsmən qəbul edir. Bundan sonra ölkənin hazırkı Prezidenti Salome Zurabişvilinin səlahiyyətlərinə avtomatik olaraq xitam verilir.
Gürcüstanın Baş naziri İrakli Kobaxidze Zurabişviliyə dəfələrlə xəbərdarlıq edib ki, əgər o, Kavelaşvilinin andiçməsindən sonra Prezident sarayını tərk etməsə, ona qarşı dövlət qurumunu qanunsuz ələ keçirdiyinə görə cinayət işi açılacaq.
