“Şuşa həbsxanasının sökülməsinə dair sosial şəbəkədə yayılan görüntülər həqiqəti əks etdirmir”.

Senzor.az bildirir ki, bunu KİV-in sorğusuna cavabında Şuşa Şəhəri Dövlət Qoruğu İdarəsinin Beynəlxalq münasibətlər və İctimaiyyətlə əlaqələr şöbəsinin müdiri Səmayə Məmmədova deyib. 

Onun sözlərinə görə, haqqında bəhs edilən görüntülər köhnə kadrlar əsasında hazırlanıb: “Və bu görüntülər reallığı əks etdirmir. Şuşa həbsxanası tarixi abidədir. Orada söküntüdən heç bir söhbət gedə bilməz. Kadrlardan da göründüyü kimi, orada söküntü prosesini özündə əks etdirən heç bir məqam yoxdur”.

Qeyd edək ki, bir neçə gündür sosial şəbəkədə Şuşa həbsxanasının sökülməsinə aid video və fotolar yayılıb.