İsrail Müdafiə Ordusu Baş Qərargahının rəisi Qəzza zolağında növbəti hərbi əməliyyatların planını təsdiqləyib.

Senzor.az yerli KİV-ə istinadən bildirir ki, bu barədə İsrail Müdafiə Ordusunun mətbuat katibi Conatan Konkrikus məlumat verib.

Mətbuat katibi planın Qəzza zolağının şimalında əməliyyatların başa çatmasından sonra həyata keçiriləcək mərhələ olduğunu deyib.

Onun sözlərinə görə, müharibənin ümumi hədəfi dəyişməz olaraq qalır: “Biz HƏMAS-ın bütün hərbi infrastrukturunu yarasız hala salıb, liderlərini zərərsizləşdirməklə İsrail dövlətinin təhlükəsizliyini təmin edəcəyik. Onlar ya təslim olacaqlar, ya da tunellərində öləcəklər”.

Mətbuat katibi bildirib ki, hadisələri qabaqlamayacaq, nə vaxt, harada və nə etməyi planlaşdırdıqlarını söyləməyəcək: “İsrail ordusu Baş Qərargahının rəisi general-leytenant Halevi əməliyyatın növbəti mərhələləri üçün planı təsdiqləyib. İsrail ordusu isə missiyamızı yerinə yetirməyə davam etməyə hazır, qadir və qərarlıdır”.