Azərbaycan və Səudiyyə Ərəbistanı arasında ticarət dövriyyəsinin artırılması, iqtisadi münasibətlərin daha da genişləndirilməsi imkanları müzakirə olunub.

Senzor.az Dövlət Gömrük Komitəsinə (DGK) istinadən xəbər verir ki, bu barədə müzakirələr bu gün DGK sədri Şahin Bağırovun Səudiyyə Ərəbistanı Krallığının ölkəmizdəki fövqəladə və səlahiyyətli səfiri İssam bin Saleh əl Cuteyli ilə keçirilən görüşdə aparılıb.

Bildirilib ki, görüşdə Azərbaycan ilə Səudiyyə Ərəbistanı arasında səmərəli əməkdaşlıq və dostluq münasibətlərinin formalaşdığı vurğulanıb, iki ölkənin gömrük orqanlarının da qarşılıqlı əlaqələrin gücləndirilməsinə, ticarət dövriyyəsinin genişləndirilməsinə mühüm töhfə verdiyi diqqətə çatdırılıb.

Azərbaycan gömrük xidməti ilə Səudiyyə Ərəbistanının Zəkat, Vergi və Gömrük Xidməti arasındakı işgüzar əlaqələrdən məmnunluqla bəhs edilib, iki qurumun nümayəndə heyətləri, işçi qrupları səviyyəsində reallaşdırılan qarşılıqlı səfərlər və görüşlərin təcrübə mübadiləsinin gücləndirilməsi baxımından mühüm imkanlar yaratdığı bildirilib.

Həmçinin iki ölkə arasında qarşılıqlı maraq doğuran digər məsələlərlə bağlı fikir mübadiləsi aparılıb.