Rusiya Ukraynaya kütləvi hücuma hazırlaşır və bunu Ukrayna kəşfiyyatının yenilənmiş məlumatları da sübut edir. Vətəndaşlara həyəcan siqnallarını qulaqardına vurmamaq və dərhal gizlənmək tövsiyə olunur.

Senzor.az yerli KİV-ə istinadən bildirir ki, bu barədə Ukrayna Prezidenti Volodimir Zelenski məlumat yayıb.

Dövlət başçısının sözlərinə görə, Ukrayna ordusu, o cümlədən, Hərbi Hava Qüvvələri mövcud müdafiə vasitələri çərçivəsində təhlükəyə cavab verməyə hazırdır.

"Xahiş edirəm, özünüzü qoruyun! Zəhmət olmasa, raket təhlükəsi siqnallarına reaksiya verin", - Zelenski qeyd edib.

O qeyd edib ki, Ukrayna səmasının qorunmasının effektivliyi əsasən tərəfdaşlardan - ehtiyac duyulan qoruyucu vasitələrə sahib olan və onları başqasına ötürə bilən hər bir liderdən, dünyanın hər bir dövlətindən - asılıdır.

Zelenski bildirib ki, bu vəsaitlərin köçürülməsi üçün, xüsusən də ABŞ, Avropa ölkələri və digər tərəfdaşlar tərəfindən siyasi iradə tələb olunur.

Xatırladaq ki, bu gün Mərkəzi Kəşfiyyat İdarəsinin keçmiş rəhbəri Andrey Kovalenko Rusiyanın Ukraynaya daha bir zərbə endirməyə hazırlaşdığını bildirib.