Bakı Metropoliteni QSC-nin Mətbuat Xidmətinin əməkdaşı Əli Fərəcov vəfat edib.
Axar.az xəbər verir ki, ötən gün səhər işə getmək üçün evdən çıxan 72 yaşlı Ə.Fərəcova zəng çatmadığı üçün ailə polisə müraciət edib.
Axtarışlar nəticəsində bu gün günorta saatlarında mərhumun cansız bədəni anasının Maştağa qəbiristanlığında yerləşən qəbrinin yanında tapılıb. İlkin məlumata görə, noyabrın 4-ü mərhumun anasının vəfatının növbəti ildönümü olub. Hər il olduğu kimi Ə.Fərəcov bu dəfə də anasının qəbrini ziyarət etməyə gedib.
Onun hansı səbəbdən dünyasını dəyişdiyi bilinmir. Araşdırma aparılır.
Qeyd edək ki, uzun illər idman jurnalistikasında çalışmış Ə. Fərəcov 1951-ci il martın 29-da doğulub. Onun metropolitendə 45 ildən artıq təcrübəsi var. Uzun müddət “Metro” qəzetinin baş redaktoru olub.
Təqaüdə çıxdıqdan sonra isə Bakı Metropoliteni QSC-nin rəhbərliyi onun təcrübəsini nəzərə alaraq müqavilə əsasında əməkdaşlığa cəlb edibmiş…
