Mərkəzi Bankın bu gün təşkil etdiyi hərracda 80.4 milyon dollarlıq sifarişin qeydə alınması valyuta bazarında tələbin hələ də yüksək olduğundan xəbər verir. Srağagün keçirilən hərracda isə 74.9 milyon dollar satılmışdı. Bu o deməkdir ki, son 2 hərracda 155.3 milyon dollar satılıb. Müqayisə üçün qeyd edək ki, ötən ilin birinci ayında keçirilən ilk 2 hərracda 103.9 milyon dollar satılmışdı. Yəni iki hərraclıq müqayisədə tələb 50 faizə yaxın artıb.

Senzor.az bildirir ki, bunları Facebook sosial şəbəkəsindəki səhifəsində millət vəkili, iqtisadçı alim Vüqar Bayramov yazıb. 

V.Bayramov qeyd edib ki, Azərbaycanda idxalın artması dollara tələbi yüksəldir: “Doğrudur, 1 həftəlik bayram günləri də dollar sifarişlərinə təsirsiz ötüşmədi. Bununla belə, xüsusən real sektorda dollar tələbində artımlar müşahidə olunmaqdadır.

Bu baxımdan, Mərkəzi Bank tərəfindən dollara tələbin artacağı ayların öncədən proqnozlaşdırılması, kommunikasiyanın gücləndirilməsi və hərracların mütəmadiliyinin tənzimlənməsi vacibdir. Hərracların keçirilməsi mütəmadiliyi tələbin daha çevik tənzimlənməsinə səbəb ola bilər”. 

V.Bayramov vurğulayıb ki, bunlar manata təzyiqi artırsa da, ölkə üzən məzənnəyə keçmədiyindən, dolların kursunu MB təyin edir.