ABŞ Maliyyə Nazirliyi İranın Kəşfiyyat və Təhlükəsizlik Nazirliyinə və onun rəhbəri İsmayıl Xətibə qarşı sanksiyalar tətbiq edib.
Bu barədə “Yevropeyskaya pravda” nəşri məlumat yayıb.
Buna səbəb sözügedən qurumun Albaniyanın dövlət informasiya sistemlərinə kiberhücumda iştirakı olub.
ABŞ Maliyyə Nazirliyi qeyd edib ki, İsmayıl Xətibin rəhbərlik etdiyi İranın Kəşfiyyat və Təhlükəsizlik Nazirliyi bir neçə kibercinayətkar qruplaşma şəbəkəsini idarə edir. Bu şəbəkələr “İranın siyasi məqsədlərini dəstəkləmək üçün” casusluq və qəsblə məşğuldur.
İran agentliyinin 2007-ci ildən “dünyada bir sıra dövlət və özəl təşkilatlara, eləcə də mühüm infrastrukturun müxtəlif sektorlarına qarşı cinayətkar kiber əməliyyatlar həyata keçirdiyi” iddia edilir.
Sanksiyalar qeyd edilən şəxslərin və onlarla əlaqəli fiziki və hüquqi şəxslərin aktivlərinin dondurulmasını, habelə hər hansı ticarət və ya maliyyə əməliyyatlarının qadağan edilməsini nəzərdə tutur.
