Əfqanıstanda hakimiyyəti ələ keçirən "Taliban" hərəkatının mətbuat katibi Zabiulla Mücahid ötən illər baş verən hadisələrə görə ABŞ-ı məsuliyyətə cəlb etməyə çağırıb.
“Anadolu” xəbər verir ki, bu barədə o, Çin mətbuatına müsahibəsində ABŞ-ın avqustun 29-da Əfqanıstanın paytaxtı Kabilə 10 dinc sakinin, o cümlədən 7 uşağın ölümü ilə nəticələnən hava zərbəsini şərh edərkən deyib.
Onun sözlərinə görə, bu, ABŞ-ın dinc sakinlərin ölümü ilə nəticələnən ilk hərəkəti deyil.
"Budur, ABŞ artıq 20 ildir Əfqanıstanda dinc vətəndaşları öldürür", - “taliblər”in nümayəndəsi deyib.
Mücahid qeyd edib ki, belə hadisələr humanitar fəlakətə gətirib çıxarır.
"ABŞ ötən illərdə baş verən hadisələrə görə məsuliyyətə cəlb edilməlidir. Onlar qətl və təzyiqin əvəzini vermək üçün, əfqan xalqı ilə əməkdaşlığa başlamalıdır", - mətbuat katibi vurğulayıb.
“Report” xatırladır ki, ABŞ hərbçilərinin avqustun 29-da Kabilə endirdiyi hava zərbəsi nəticəsində 10 dinc sakin həlak olub.
