Futbol üzrə Azərbaycan millisi AVRO-2024-ün seçmə mərhələsində dördüncü oyununu keçirib.
Senzor.az bildirir ki, Canni De Byazinin baş məşqçisi olduğu kollektiv Bakıda Belçikanı qəbul edib.
“Dalğa Arena”da oynanılan qarşılaşma qonaqların 1:0 hesablı qələbəsi ilə bitib. Yeganə qola 38-ci dəqiqədə Yannik Karrasko imza atıb.
Bu qalibiyyət sayəsində xallarının sayını 10-a çatdıran belçikalılar F qrupunda liderliyə yüksəliblər. Azərbaycan yığması isə hesabındakı 1 xalla sonuncu yerdə qalıb.
Qeyd edək ki, Azərbaycan yığması sentyabrın 12-də eyni stadionda İordaniya ilə yoldaşlıq görüşü keçirəcək.
**10:43
Azərbaycan futbol millisi bu gün AVRO-2024-ün seçmə mərhələsində növbəti oyununa çıxacaq.
Senzor.az bildirir ki, yığma V tur çərçivəsində Belçika ilə üz-üzə gələcək.
Bakıda “Dalğa Arena”da keçiriləcək görüş saat 17:00-da start götürəcək. Matçın baş hakimi serbiyalı FIFA referisi Nenad Minakoviç olacaq.
Tarixində beşinci dəfə “qırmızı şeytanlar”la üz-üzə gələcək millimiz əvvəlki dörd oyunun üçündə uduzub, birində isə heç-heçə edib.
Qeyd edək ki, F qrupunda yer alan yığmamız üç oyundan sonra bir xalla sonuncu pillədədir. Aktivində yeddi xalı olan Belçika seçməsi isə ikinci sırada qərarlaşıb.
