İrəvanın Respublika meydanında Ermənistan baş naziri Nikol Paşinyan əleyhinə növbəti mitinq keçirilir.

Senzor.az Ermənistan mətbuatına istinadən xəbər verir ki, etirazçılar Paşinyanın istefasını tələb edirlər.

Mitinqdən əvvəl vətəndaşlar İrəvanın müxtəlif küçələrində itaətsizlik aksiyaları təşkil edib, bir sıra küçələri bağlayıb, daha çox vətəndaşı onlara qoşulmağa çağırıblar.

Lakin polis bütün cəhdlərin qarşısını almağa çalışır, aktivlik göstərənlər isə həbs olunur. 

Xatırladaq ki, bundan əvvəl baş nazir Nikol Paşinyan hökumətin İrəvan küçələrində nümayişçilərə qarşı sərt davranacağı barədə xəbərdarlıq etmişdi. 

Onun sözlərinə görə, bəzi qüvvələr İrəvanda qan tökmək istəyir: “Bunlar ölkənin keçmiş rəhbərlərindən birinin oğlu və yüksək rütbəli məmurları ilə əlaqəli bəzi qruplardır”.

"Onlar istəyirlər ki, hökumət İrəvan küçələrində qan töksün. Amma bu, baş verməyəcək", - Paşinyan vurğulamışdı. 

Onu da qeyd edək ki, İrəvanda bir neçə gündür Qarabağ hadisələri fonunda Ermənistanın baş naziri Nikol Paşinyanın istefası tələbi ilə etiraz aksiyaları davam edir.

Senzor.az