Azərbaycanın Belçikadakı səfiri və Avropa İttifaqındakı Nümayəndəliyinin rəhbəri Vaqif Sadıqov Belçika Xarici İşlər Nazirliyinə və polisə təşəkkür edib.
Senzor.az bildirir ki, səfir bu barədə “X” şəbəkəsindəki paylaşımında yazıb.
“Oktyabrın 1-də erməni ekstremistlərinin Azərbaycan səfirliyinə qarşı mümkün zorakılığının qarşısının alınması üçün lazımi ehtiyat tədbirlərinin görülməsinə görə, Belçika Xarici İşlər Nazirliyinə və Brüsselin Montqomeri Polis Departamentinə minnətdarlığımızı bildiririk. Çox sağ olun!” - paylaşımda bildirilib.
Xatırladaq ki, diplomat oktyabrın 1-i saat 14:00-da Belçikada fəaliyyət göstərən ekstremist erməni diaspor təşkilatlarının Fransadan gələn analoji radikal dəstələrlə birlikdə Brüsselin Rond-Point Şuman meydanında mitinq təşkil edəcəyi haqqında xəbərdarlıq etmişdi.
Səfir mitinqdən sonra ekstremist dəstələrin Azərbaycan səfirliyinə qarşı zorakılıq tətbiq etməyi planlaşdırdıqlarını bildirmişdi.
