Serbiyanın Baş naziri Ana Brnabiç müxalifətin ötən ay keçirilmiş parlament və yerli özünüidarəetmə orqanlarına seçkilərdə saxtakarlıq ittihamlarını rədd edib, yeni hökumətin Avropa İttifaqına (Aİ) inteqrasiya istiqamətində fəaliyyətini davam etdirəcəyini vurğulayıb.
Bu barədə A.Brnabiç “Politico” üçün yazdığı köşə yazısında bildirib.
O qeyd edib ki, Serbiyada növbədənkənar seçkilər məhz müxalifətin tələbi ilə keçirilib, lakin məhz elə onlar səsvermə günündən əvvəl beynəlxalq müşahidəçilərə nəticələri tanımayacaqları barədə birbaşa məlumat veriblər.
Baş nazir son illərdə Serbiya hökumətinin seçki vəziyyətini yaxşılaşdırmaq üçün qəbul etdiyi bir sıra islahatları sadalayıb və müşahidəçilərin səsvermənin nəticələri ilə bağlı heç bir əhəmiyyətli xəbərdarlığının olmadığını vurğulayıb.
“Yeni hökumət üçün birmənalı prioritet olan Aİ-yə inteqrasiya üzrə işi davam etdirmək üçün əsas olan şey yeni hökumətin səmərəli şəkildə formalaşdırılmasıdır”, - siyasətçi yazıb.(“Report”)
