Bu gün Banqladeşdə keçirilən etiraz aksiyalarında ölənlərin sayı, 14-ü polis əməkdaşı olmaqla, 67 nəfərə çatıb.
Senzor.az bildirir ki, iğtişaşlarla əlaqədar Daxili İşlər Nazirliyi saat 18:00-dan (Bakı vaxtı ilə saat 16:00-dan) komendant saatı, yaxın üç günü isə istirahət günü elan edib.
"Paytaxt da daxil olmaqla bütün şəhərlərdə, rayonlarda, şəhər korporasiyalarında, bələdiyyələrdə, sənaye bölgələrində, rayon mərkəzlərində və qərargahlarda komendant saatı tətbiq olundu", - Banqladeşin Daxili İşlər Nazirliyi bildirib.
Bundan əvvəl operatorlar respublika hökumətindən 4G rabitə xidmətlərini söndürmək və sosial şəbəkələrə girişi bloklamaq barədə göstəriş alıblar. Yerli KİV-in məlumatına görə, bankların və mağazaların əksəriyyəti bağlanıb.
**16:48
Banqladeşdə polis, etirazçılar və hakim partiya fəalları arasında toqquşmalarda azı 12 nəfər ölüb, onlarla insan yaralanıb.
Bu barədə “Reuters” xəbər verib.
Qeyd olunur ki, polis Baş nazir Şeyx Hasini istefaya çağıran on minlərlə etirazçını dağıtmaq üçün gözyaşardıcı qaz və səsli qumbaradan istifadə edib.
Məlumata görə, bazar günü ölkə daxilində bərpa olunan etiraz aksiyaları zamanı nümayişçilər əsas magistral yolları bağlayıblar, işə gedən iki inşaatçı ölüb, 30 nəfər üçtərəfli toqquşma nəticəsində yaralanıb.
Agentlik bildirib ki, Pabn rayonunun şimal-şərq bölgəsində hakim partiyanın fəalları və etirazçıların toqquşması zamanı azı üç nəfər ölüb, 50 nəfər yaralanıb. Daha iki nəfər Boqura dairəsinin şimal dairəsində, beş nəfərsə digər dörd rayonda ölüb.
