Gürcüstan hüquq-mühafizə orqanları Tbilisidə parlament binası yaxınlığında keçirilən aksiyanın dağıdılması zamanı 50 nəfəri saxlayıb.

Bu barədə Gürcüstanın “Rustavi 2” telekanalı məlumat yayıb.

Məlumata görə, etirazçılar inzibati qaydada saxlanılıb. Ümumilikdə 3 günlük mitinqlərdə saxlanılanların sayı 200-dən artıqdır.

Qeyd edək ki, son iki gündə Gürcüstanın bütün şəhərlərində kütləvi etiraz aksiyaları keçirilir.

Noyabrın 29-dan 30-na keçən gecə Tbilisidə parlament binası yaxınlığında polislə etirazçılar arasında toqquşma olub. Polis su şırnaqlarından və gözyaşardıcı qazdan istifadə etmək məcburiyyətində qalıb.

**10:10

Gürcüstan Prezidenti ölkə parlamentinin və hökumətinin “tamamilə qeyri-legitim olduğunu” bəyan edib. 

Senzor.az bildirir ki, bu barədə yerli KİV-lər yazıb. 

Onun sözlərinə görə, Gürcüstan “Gürcü Arzusu”nun “antidemokratik, anti-Qərb, anti-Avropa və anti-Gürcü siyasətinin” girovuna çevrilib.

“İndi həmişəkindən daha çox aydın oldu ki, onların tutduqları kurs yalnız bir istiqamətə - Rusiyaya doğru aparır”, - deyə Zurabişvili vurğulayıb.

Bu arada Tbilisidə etirazçılar dekabrın 1-i səhər də dağılışmayıblar. Hazırda aksiya iştirakçıları Çavçavadze küçəsində, Tbilisi Universitetinin birinci korpusunun qarşısında toplaşıblar.

Hələ ki, polislə yeni toqquşma qeydə alınmayıb. Baxmayaraq ki, gecəboyu polislə aksiya iştirakçıları arasında periodik olaraq qarşıdurmalar yaşanıb. 

**

Etirazçılar bir-birlərini qələbə münasibətilə təbrik edir və tonqalların ətrafında isinirlər. 

Bu, artıq hakimiyyətə qarşı mitinqlərin dördüncü günüdür.

**01:38

Tbilisidə polis parlament binasının ətrafındakı etirazçılara müdaxilə etməyə başlayıb.

Senzor.az yerli KİV-ə istinadən bildirir ki, xüsusi təyinatlı polis dəstələri parlament binasının girişlərini tutmağa çalışan etirazçıları ərazidən çıxarmağa başlayıblar. 

Bunun üçün əsasən su şırnağından istifadə edilir.

Etirazçılar isə təslim olmaq istəmir, polisin müdaxiləsinə daş və pirotexniki vasitələr atmaqla qarşılıq verir.