Əhməd Məsudun rəhbərlik etdiyi qruplaşma “Taliban”ı Pəncşir yaxınlığında məğlub edib.
Senzor.az yerli KİV-ə istinadən bildirir ki, məlumatı Əfqanıstan Müqavimət Cəbhəsinin mətbuat katibi Fəhmi Dəşti yayıb.
Onun sözlərinə görə, toqquşma Baqlan vilayətinin Andarob rayonunda baş verib. Toqquşma nəticəsində 10 talibin öldürüldüyü, 50 nəfərin isə yaralandığı bildirilib.
Bu arada "Al Arabiya" telekanalı toqquşmadan dərhal sonra Pəncşir əyalətində internet və telefon əlaqəsinin bərpa olunduğu barədə xəbər yayıb. Qeyd edək ki, əyalətdə internet və telefon əlaqəsini “Taliban” məhdudlaşdırmışdı.
Xatırladaq ki, taliblərin hakimiyyəti ilə razılaşmayan qüvvələr Pəncşirdə məşhur səhra komandiri Əhməd Şah Məsudun oğlu Əhməd Məsudun rəhbərlik etdiyi müqavimət təşkil ediblər. Əşrəf Qaninin ölkəni tərk etməsindən sonra özünü müvəqqəti dövlət başçısı elan edən vitse-prezident Əmrullah Saleh də müqavimətçi qüvvələrə qoşulub.
