İran parlamentinin sədri Məhəmmədbaqer Qalibaf ABŞ-ın maliyyə naziri Skott Bessentin ölkəsinin son iki həftə ərzində regiondan 130 milyon barel neft keçirə bildiyinə dair bəyanatlarını təkzib edib.

Senzor.az bildirir ki, bu barədə Qalibaf "X" sosial şəbəkəsindəki səhifəsində paylaşım edib.

Daha əvvəl Bessent paylaşım edərək bildirib ki, Amerikanın blokadası və "İqtisadi təcrid" əməliyyatı zəifləməkdə olan İran iqtisadiyyatını darmadağın edəcək. O həmçinin qeyd edib ki, ABŞ son 14 gün ərzində regiondan 130 milyon barel neft çıxara bilib.

İran parlamentinin spikeri ABŞ-ın maliyyə nazirini yalançılıqda ittiham edib və onu Vaşinqtonun müharibə xərclərinə baxmağa çağırıb.

"Köməkçilərinizdən sizə "Moody's"in məlumatlarını təqdim etmələrini xahiş edin, həmin məlumatlara əsasən, ABŞ-ın İranla müharibə xərcləri 130 milyard dollardan çox təşkil edib", - Qalibaf yazıb.

Daha əvvəl ABŞ Prezidenti Donald Tramp İrana qarşı iqtisadi təzyiqlərin gücləndirilməsi üzrə irimiqyaslı əməliyyatın başladığını elan etmişdi. Buna cavab olaraq Qalibaf qeyd edib ki, ABŞ-ın İrana göstərdiyi hərbi və iqtisadi təzyiq Vaşinqtonun özü üçün ağır nəticələrə gətirib çıxaracaq.