Sentyabrın 6-da Bakının Suraxanı Rayon Məhkəməsi keçmiş nəqliyyat naziri Ziya Məmmədovun oğlu Anar Məmmədovun bloger Mehman Hüseynova qarşı iddiasını təmin etməyib.
M.Hüseynov Turan-a bildirib ki, şikayətə A.Məmmədovun Londondakı bahalı avtomobillərinin fotolarının sosial şəbəkələrdə yayılması səbəb olub.
Keçmiş nazirin oğlu bildirib ki, material blogerə məxsus akkauntda dərc edilib.
"Amma biz məhkəmədə sübut etdik ki, bu akkauntun mənə aidiyyəti yoxdur. Facebook, İnstagram, Youtube kimi sosial şəbəkələrdəki hesablarımın hamısı mənim adıma rəsmi qeydiyyatdan keçib və xüsusi qeyd olunub", - deyə bloger bildirib və qeyd edib ki, iddiaçının narazılığına səbəb olan akkauntdakı yazıların blogerə aidiyyəti yoxdur.Məhkəmə cavabdehin və onun vəkili Şəhla Hümbətovanın dəlillərini qəbul edib və iddianı təmin etməyib.
