“Türkiyə Prezidenti Rəcəb Tayyib Ərdoğan yaxın vaxtlarda Rusiyaya gedəcək. Onun həmkarı Vladimir Putinlə görüşü planlaşdırılır”.
Bu barədə “Yeni Şafak” Türkiyə Prezident Administrasiyasındakı mənbələrə əsasən bildirib.
Qeyd edilib ki, səfər xüsusilə “Taxıl sazişi”nin bərpası baxımından mühüm əhəmiyyət daşıyır: “Ərdoğanın səfəri “Taxıl sazişi”nin bərpası üçün ən mühüm addım olacaq”.
Bundan başqa, vurğulanıb ki, Ərdoğanın baş müşaviri Akif Çağatay Kılıç Ukraynaya gedəcək.
Qeyd edək ki, daha əvvəl Putinin avqustun sonunda Türkiyəyə gedəcəyi iddia edilirdi.
Xatırladaq ki, BMT Təhlükəsizlik Şurasının Ukrayna ilə bağlı keçirilən iclasında əksər ölkələr Rusiyanı "Taxıl sazişi"nin müddətini uzatmağa çağırıb. Sənədin müddəti iyulun 17-də başa çatıb və Moskva hələlik iştirakını yeniləmək niyyətində olmadığını açıqlayıb.
Rəsmi Moskvanın bu ay dördtərəfli (Ukrayna, Türkiyə, BMT və Rusiya) “Taxıl sazişi”ndən çıxması Odessa ətrafında hərbi vəziyyəti gərginləşdirməklə yanaşı, qlobal humanitar böhran təhlükəsi yaradıb.
