“Hər şey masanın üzərindədir. Biz də Ermənistan və Azərbaycan arasında davamlı sülhün bərqərar olması üçün ən faydalı hesab etdiyimizi həyata keçirəcəyik”.

Senzor.az yerli KİV-ə istinadən bildirir ki, bunu ABŞ Dövlət Departamentinin mətbuat katibi Ned Prays Soçidə keçirilən Azərbaycan, Ermənistan və Rusiya liderlərinin görüşü ilə bağlı sualı cavablandırarkən deyib.

O, ABŞ-ın bu görüşdə iştirakçı olmadığını xatırladaraq əlavə edib: “Lakin Dövlət katibi Blinken bunu dəfələrlə, o cümlədən iki xarici işlər nazirini Nyu-Yorkda bir araya gətirərkən vurğulayıb ki, biz Ermənistan-Azərbaycan sülhünə və iki ölkə arasında danışıqlara sadiqik”.

Prays birbaşa dialoqun problemlərin həlli və davamlı sülhə nail olmaq üçün açar olduğunu deyərək, hər iki ölkənin sülh istədiyini bəyan etdiyini vurğulayıb: “Beləliklə, biz Ermənistan və Azərbaycan arasında ikitərəfli şəkildə, tərəfdaşlarımız və çoxtərəfli təşkilatlar vasitəsilə müzakirələri asanlaşdırmaq, təmin etmək üçün növbəti aylarda fəaliyyətə davam edəcəyik”.