ABŞ Prezidenti Cozef Bayden Miçiqandakı çıxışından sonra dünya çempionatında Birləşmiş Ştatlar millisinin İran komandası üzərində qələbəsindən xəbər tutaraq, futbolçuları təbrik etmək üçün səhnəyə qayıdıb.
Senzor.az yerli KİV-ə istinadən bildirir ki, bundan əvvəl iqtisadi mövzularda çıxış edən Bayden sevinclə deyib: "ABŞ (hesabda-red.) bir, İran sıfırdır! Oyun bitdi!".
"ABŞ! ABŞ! Bu, ən vacib matçdı, dostlar. Onlar (amerikalı futbolçular və onların məşqçisi - red.) bunu etdilər, Allah onları qorusun! Ümumiyyətlə, mən sadəcə fikirləşdim ki, sizə maraqlı olacaq", - deyə Prezident tamaşaçıların sevincli nidalarına əlavə edib.
Qeyd edək ki, ABŞ yığması Qətərdə keçirilən dünya çempionatında 1/8 finala yüksələn növbəti komanda olub. Amerikalılar buna B qrupunun III turunun İranla oyununda 1:0 hesablı qələbə qazanaraq nail olublar.
Komanda növbəti raundda A qrupunun birincisi Niderland yığması ilə üz-üzə gələcək.
