ABŞ müdafiə nazirinin beynəlxalq təhlükəsizlik məsələləri üzrə köməkçisi Selest Uollander bildirib ki, ABŞ hakimiyyəti bir çox ölkələrlə Rusiya və İran arasında hərbi-texniki əməkdaşlıq üzrə müzakirə aparır və hesab edir ki, Yaxın Şərq dövlətləri Moskva və Tehran arasında əməkdaşlıqdan narahat olmalıdırlar.

Senzor.az bildirir ki, bu barədə o, Vaşinqtonda Yeni Amerika Təhlükəsizliyi Mərkəzində keçirilən tədbirdə çıxış edərkən danışıb.

Pentaqon rəsmisinin sözlərinə görə, Birləşmiş Ştatlar bir çox ölkələrlə diplomatik şəkildə işləyir ki, onları Rusiya və İran arasında əməkdaşlıqla bağlı çətinliklərdən xəbərdar etsin: “Bu təkcə Ukrayna vətəndaşları üçün təhlükə yaratmır, həm də Tehrana dəstək verməklə İranın bədxah fəaliyyətlərini artıra bilər. Yaxın Şərq ölkələri ilə söhbətimiz bundan ibarətdir ki, onlar diqqət etməli, bundan narahat olmalı və mümkün olan yerlərdə buna qarşı çıxmaq üçün bizimlə çalışmalıdırlar”.

Onun sözlərinə görə, ABŞ İranın regionda təqdim etdiyi çağırışlardan xəbərdardır və Pentaqon Tehranın nüvə silahı əldə etməsinin qarşısını almaq üçün mütəmadi müvafiq addımlar atır: “İndi bunun üzərinə Rusiya və İran arasında müdafiə sahəsində əməkdaşlığa aid olan narahatlıq doğuran hərəkətlər də gəlir. Amma bu, bizim problemlə bağlı qiymətləndirməmizi əsaslı şəkildə dəyişmir”.