“Vaqner” özəl hərbi şirkətinin (ÖHŞ) rəhbəri Yevgeni Priqojinin təyyarəsi vurulub. Baş verən olayda zərərçəkən olmasa da, hadisənin kim və ya kimlər tərəfindən törədilməsi sual doğurub.
“Hava dueli” çağırışı
Hadisənin Y.Priqojinin Ukrayna Prezidenti Volodimir Zelenskiyə videomüraciətində onu “hava duelinə” çağırmasından sonra baş verməsi diqqət çəkir.
Priqojin Donetsk vilayətinin Baxmut rayonunda “Su-24” təyyarəsi ilə uçuş həyata keçirərkən vurulub. Mümkündür ki, o bu yolla Ukrayna Prezidentini duelə dəvət edərkən nə dərəcədə ciddi olduğunu və onu gözlədiyini göstərməyə çalışıb.
Diqqətçəkən məqam isə Priqojinin içərisində olduğu “Su-24” təyyarəsinin Ukrayna hava hücumundan müdafiə sistemi tərəfindən vurulmasıdır. Onun məhz Donetsk vilayətinin Baxmut rayonunda olması, “Su-24” təyyarəsi ilə uçuş həyata keçirməsi kimi məlumatları Ukrayna tərəfi belə rahatlıqla əldə edə bilməzdi. Bu həm də baş verən hadisənin Kremldaxili çəkişmədən qaynaqlana biləcəyi ehtimalını gücləndirir. 
Kremldaxili çəkişmə
“Vaqner” özəl hərbi şirkəti bu gün Suriya, Afrika, Ukrayna və s. ölkələrdə quru əməliyyatlarında iştirak edən qeyri-rəsmi hərbi birləşmədir.
Şirkətin döyüşçüləri çoxsaylı hərbi cinayətlər, o cümlədən məhkəmədənkənar edamlar törətməkdə şübhəli bilinir. ÖHŞ-nin qurucusu və sponsoru Yevgeni Priqojin də bunları inkar etmir.
Priqojin həm birbaşa Prezident Vladimir Putindən (“Vaqner”in yaradıcısını “Rusiya liderinin aşpazı” da adlandırırlar) təlimat aldığı, həm də ölkədaxili cinayətləri icra etdiyi üçün hərbi-siyasi elitada ona nifrət var. Bu mənada Kreml daxilində Priqojinin ölümünü arzulayan şəxslərin olduğunu deyə bilərik.
Mümkündür ki, Priqojinin “Su-24” təyyarəsi ilə Donetsk vilayətinin Baxmut rayonunda uçuş həyata keçirməsi informasiyasını Ukrayna tərəfinə məhz onun ölməsini istəyən rusiyalı siyasi və ya hərbi elita nümayəndələri məqsədyönlü şəkildə ötürüblər.
Turan Rzayev,
Politoloq
