Ukrayna Prezidentinin Ofisi Haaqa Beynəlxalq Cinayət Məhkəməsinin Rusiya Prezidenti Vladimir Putin və Rusiyanın uşaq hüquqları üzrə komissarı Mariya Lvova-Belovanın həbsi üçün orderlər verməsinə münasibət bildirib.

Senzor.az bildirir ki, Ofisin rəhbəri Andriy Yermak öz Telegram kanalında Ukraynanın Beynəlxalq Cinayət Məhkəməsi ilə sistemli şəkildə əməkdaşlıq etdiyini yazıb.

"Ukraynanın uşaqların qorunması və təhlükəsizliyi üzrə Koordinasiya Şurası da fəaliyyət göstərir, vəzifəsi uşaqların zorla Ukraynadan Rusiya Federasiyasına köçürülməsini və ya deportasiyasını dayandırmaq və uşaqların maraqlarına və beynəlxalq hüquqa uyğun olaraq ailələrinə geri qaytarmaq və qovuşdurmaqdır", - deyə o vurğulayıb. 

Yermak xatırladıb ki, Ukrayna hakimiyyəti 16 mindən çox uşağın məcburi deportasiyası faktını qeydə alıb. “Həqiqi rəqəmlər dəfələrlə çox ola bilər. 308 uşaq geri qaytarılıb. Bu, kifayət qədər çətin prosesdir, lakin biz bunun üzərində işləyirik”, - Yermak qeyd edib.

Xatırladaq ki, Beynəlxalq Cinayət Məhkəməsinin hakimləri bildiriblər ki, Prezident Vladimir Putinin 24 fevral 2022-ci il tarixindən sonra Ukraynanın işğal edilmiş ərazilərindən əhalinin (uşaqların) qanunsuz deportasiyası və Rusiyaya köçürülməsi kimi hərbi cinayətə görə şəxsən məsuliyyət daşıdığını əsaslandırmaları üçün kifayət qədər faktları və arqumentləri var.

Senzor.az