"Müharibələr təbiət etibarı ilə gözlənilməzdir, onları proqnozlaşdırmaq olmur. Ona görə də bu gün heç kim bu müharibənin (Ukraynadakı müharibə - red.) nə vaxt bitəcəyini deyə bilmir".
Bunu NATO Baş katibi Yens Stoltenberq jurnalistlərə deyib.
"Ümid edirəm ki, ukraynalılar çox irəliləyiş əldə edə biləcəklər və tezliklə ədalətli və dayanıqlı sülhə nail olmaq mümkün olacaq. Amma bunu heç kim əminliklə deyə bilməz. Ona görə də biz uzun yola hazır olmalıyıq", -NATO Baş katibi əlavə edib.
O bildirib ki, NATO müttəfiqləri bu müddətdə Ukraynanın yanında olacaqlarını bəyan ediblər. Alyansın Baş katibi əlavə edib ki, NATO Ukraynanı uzunmüddətli perspektivdə dəstəkləməyə ehtiyac duyur: "Biz müharibə bitdikdən sonra da Ukraynanı dəstəkləməliyik. Çünki biz Ukraynanın yeni hücumların qarşısını almaq üçün hərbi gücünə, imkanlarına, çəkindirici gücə malik olmasını təmin etməliyik, hamımız bu müharibənin ötən ilin fevralında başlamadığını bilirik. Müharibə 2014-cü ildə Rusiya Krımı qeyri-qanuni ilhaq edəndə və Rusiya ilk dəfə Donbasın şərqinə köçəndə başlayıb. Və sonra fevral ayında tam miqyaslı işğalla üzləşmişik. Beləliklə, müharibə başa çatdıqda, onun həqiqətən bitməsini və davamlı sülhün olmasını təmin etməliyik. Buna əmin olmaq üçün isə bizim Ukrayna ilə uzunmüddətli əlaqələrə ehtiyacımız var və buna görə də Ukrayna qüvvələri ilə tam qarşılıqlı fəaliyyətin təmin edilməsinə kömək etmək üçün NATO-nun çoxillik proqram paketini qəbul etməliyik".(APA)
