Məşhur türkiyəli müğənni Sezen Aksu azərbaycanlı pərəstişkarını məhkəməyə verib.

Türkiyə mətbuatının yazdığına görə, pərəstişkarı müğənnini qorxudub.

Belə ki, gecə saatlarında Sezen Aksunun Beykozda yerləşən dənizkənarı malikanəsində qapının zəngi çalınıb. Qapını açan mühafizəçi qarşısında 47 yaşlı Azərbaycan əsilli qadını görüb. “Sezen xanımla görüşmək istəyirəm”, - deyə qadın bildirib. Mühafizəçi artıq gec olduğunu deyib və ona icazə verməyib. Qadın mühafizəçini itələyərək evin həyətinə daxil olub. “Sizi öldürərəm. Rədd olun, gedin. Sezen xanımı öldürməkmi istəyirsiniz? Burada onu həbsdə saxlayırsınız. Heç kimlə görüşməsinə imkan vermirsiniz”, - deyə qadın təhdid edib. Hadisənin şahidi olan mühafizəçi qadına qarşı şikayət ərizəsi verib.

Həmçinin qadından şikayətçi olan Sezen Aksu da bununla bağlı ifadə verib. “Bu şəxs mart, may, iyul və oktyabr aylarında 4 dəfə evimə gəlib, qapını güclə açıb, təhlükəsizliyimə təhdid yaradıb və təhqir edərək məni narahat edib. 2022-ci ilin oktyabrında o, içəriyə daxil olmağa cəhd edib. Bir dəfə evimin estakadasına yaxınlaşaraq körpüyə ziyan vuracaq şəkildə dağıntılara səbəb olub. Lakin o zaman pərəstişkarım hesab etdiyim üçün şikayət etməmişdim. Bu mərhələdə narahatlıq səviyyəsi artdığı üçün şikayətçiyəm”, - deyə o, ifadəsində qeyd edib.

Senzor.az bildirir ki, polis Azərbaycan vətəndaşının adının və soyadının yalnız baş hərflərini açıqlayıb - L.M.  L.M özü ifadəsində hər şeyi təkzib edərək, müstəntiqləri əmin edib ki, o, yalnız Aksu ilə danışmaq və ona hədiyyələr vermək istəyib. Lakin onu müğənninin yanına buraxmayan mühafizəçilərin kobudluğu və təkəbbürü L.M.-ni özündən çıxarıb.

Onu da qeyd edək ki, Azərbaycan vətəndaşını 1 ildən 4 ilə qədər həbs cəzası gözləyir.