Azərbaycan millisinin hücumçusu, “Qarabağ” komandasının baş məşqçisi Qurban Qurbanovin oğlu Musa Qurbanlı İsveçdə növbəti qollarını vurub.
Senzor.az bildirir ki, “Yurqorden”in hücumçusu ölkə çempionatının 21-ci turunda “Degefors”la matçda dubl edib.
Artıq 2-ci dəqiqədə Musanın dabanla yerinə yetirdiyi möhtəşəm qol ötürməsindən sonra meydan sahibləri hesabda önə keçiblər. 23 və 34-cü dəqiqələrdə isə gənc forvard özü fərqlənib.
Təəssüf ki, 58-ci dəqiqədə azərbaycanlı futbolçu penaltini qola çevirə bilməyib. Amma bu matçın nəticəsinə təsir etməyib. Belə ki, bir az sonra onun komandası növbəti qolunu vurub və yekunda 4-1 hesabı ilə qalib gəlib.
Qeyd edək ki, “Yurqorden” 37 xalla İsveç çempionatında lider “Elfsborq”dan 8 xal geri qalaraq 4-cü yerdədir.
Onu da xatırladaq ki, M.Qurbanlı daha əvvəl “Yurqorden”in ölkə kubokunda “Sandviken”lə keçirdiyi matçda fərqlənmişdi.
