Hazırkı ABŞ lideri Co Bayden Trampın tərəfdarlarını zibillə müqayisə etdikdən sonra Respublikaçılar Partiyasından prezidentliyə namizəd Donald Tramp Viskonsin ştatında zibil maşını sürərkən görüntülənib.
Bu barədə TASS xəbər yayıb.
"Mənim zibil maşınım haqqında nə düşünürsünüz? Bu, ABŞ-ın vitse-prezidenti Kamala Harris və Co Baydenin şərəfinə olan yük maşınıdır", - deyə o, Viskonsin ştatında seçki kampaniyası mitinqindən əvvəl jurnalistlərə bildirib.
Xatırladaq ki, oktyabrın 28-də Nyu-Yorkda Trampın seçkiqabağı mitinqinin açılışında çıxış edən ABŞ-li komediya ustası Toni Hinçkliff uğursuz zarafat edib və Puerto-Rikonu "üzən zibil adası" adlandırıb. Respublikaçı namizədin seçki qərargahı onun sözlərini təkzib edib.
Oktyabrın 29-da Bayden Puerto-Riko sakinlərinin yaxşı insanlar olduğunu deyib və qeyd edib ki, bu ölkədə gördüyü "yeganə üzən zibil" Trampın tərəfdarlarıdır.
Daha sonra Bayden fikirlərini yumşaltmağa çalışaraq bildirib ki, "zibil" ifadəsi altında o, komediya ustasının Latın amerikalılara qarşı nifrət doğuran sözlərini nəzərdə tutur.
Trampın tərəfdarları Baydenin onlara qarşı təhqirlərinin iyrənc olduğunu bildiriblər. Onların fikrincə, Bayden ABŞ əhalisinin yarısını "zibil" adlandırıb.
