Quba rayonunun Üçgün kəndi ərazisində ağır yol-nəqliyyat hadisəsi baş verib.
APA bildirir ki, "Lexus" markalı avtomobil yoldan çıxaraq dərəyə aşıb.
Qəza nəticəsində 1979-cu il təvəllüdlü, Xaçmaz rayon sakini Orucov Şamil Zehyəddin oğlu həyatını itirib.
1985-ci il təvəllüdlü Faiq Orucov, 1978-ci il təvəllüdlü Ratiq Dəmirov və 1977-ci il təvəllüdlü Ceyhun Abdullayev xəsarət alıblar. Onlar Quba Mərkəzi rayon Xəstəxanasına yerləşdiriliblər.
Xəstəxanadan bildirilib ki,15.12.2024-cü il tarixində saat 19:09-da Quba rayonu Üçkün kəndi ərazisində baş verən yol-nəqliyyat hadisəsi ilə əlaqədar Quba Rayon Mərkəzi Xəstəxanasının Təcili və təxirəsalınmaz tibbi yardım şöbəsinə çağırış daxil olub.
Hadisə yerinə dərhal təcili tibbi yardım briqadası cəlb olunub. Xəsarət alan 3 nəfər (kişi cinsli) Quba Rayon Mərkəzi Xəstəxanasına hospitalizasiya olunub.
1985-ci il təvəllüdlü şəxsə bədənin bir neçə nahiyəsinin yumşaq toxumalarının küt travması, 1978-ci il təvəllüdlü şəxsə boyunun və döş qəfəsinin yumşaq toxumalarının küt travması, 1977-ci il təvəllüdlü şəxsə isə göz qapağının və qaşın kəsilmiş açıq yarası diaqnozu təyin olunub.
Hazırda Təcili Tibbi Yardım bölməsində müalicələri davam etdirilir. Vəziyyətləri stabil olaraq qiymətləndirilir.
Qəza nəticəsində dünyasını dəyişən Şamil Orucovun Xaçmazda yerləşən və "Mal bazarı" kimi tanınan bazarın sahibi olduğu bildirilir.
Hadisə ilə bağlı araşdırma aparılır.
