Şəmkirdə 5 nəfərin ölümü ilə nəticələnən ağır qəza baş verib.
Senzor.az Daxili İşlər Nazirliyi Mətbuat Xidmətinin Gəncə regional qrupuna istinadən bildirir ki, hadisə yanvarın 24-ü saat 23 radələrində Bakı-Qazax-Gürcüstan sərhədi yolunun Şəmkir rayon ərazisindən keçən hissəsində qeydə alınıb.
Qrupun baş inspektoru Eşqin Qasımovun verdiyi məlumata görə, araşdırmalar zamanı məlum olub ki, Şəmkir rayon sakini, 26 yaşlı Xətai Əliyev idarə etdiyi "VAZ 2106" markalı maşınla Qazax rayonu istiqamətində hərəkətdə olarkən yolun əks hərəkət istiqamətinə daxil olub və qarşıdan gələn Şəmkir rayon sakini, 41 yaşlı Zaur Cabbarovun idarə etdiyi “Niva” markalı avtomobillə toqquşub. Toqquşma nəticəsində "VAZ 2106"nın sürücüsü və həmin avtomobildə olan sərnişin - Şəmkir rayon sakini 28 yaşlı Röyal Allahverdiyev, həmçinin "NİVA" markalı avtomobilin sürücüsü və həmin avtomobilin sərnişini - Şəmkir rayon sakini 53 yaşlı Elşən Xudaverdiyev, eyni zamanda, hələlik kimliyi istintaqa məlum olmayan daha bir nəfər ölüb.
"VAZ2106"da olan digər sərnişin - 1996-cı il təvəllüdlü Elçin Orucov isə xəstəxanaya yerləşdirlib.
Faktla bağlı araşdırmalar davam etdirilir.
