Münxendə avtomobili insanların üzərinə sürən şəxsin Almaniyada sığınacaq axtaran 24 yaşlı əfqan miqrant olduğu müəyyən edilib.
Senzor.az yerli KİV-ə istinadən bildirir ki, həmin şəxsin avtomobili aksiya iştirakçılarının üzərinə sürməsi nəticəsində xəsarət alanların sayı 28 nəfərə çatıb. Onların bir neçəsinin vəziyyəti ağırdır. Həmin şəxsin əvvəllər narkotik maddə və mağaza oğurluğu ilə əlaqədar polis tərəfindən nəzarətdə saxlanıldığı bildirilir.
Rəsmilər bu hücumun sabah işə başlayacaq Münxen Təhlükəsizlik Konfransı ilə əlaqədar olmadığını açıqlayıblar.
Bavariya əyalətinin Baş naziri Markus Söder (CSU) hadisəni terror aktı kimi qiymətləndirib. O, hadisəyə təmkinli, ancaq qətiyyətli reaksiya veriləcəyini açıqlayıb.
Almaniyanın Kansleri Olaf Şolts (SPD) hadisəni törədən şəxsə qarşı heç bir güzəştin tətbiq edilməyəcəyini, onun cəzasını çəkməli və ölkəni tərk etməli olduğunu bildirib. Kansler seçki kampaniyası çərçivəsində etdiyi çıxışda deyib ki, Almaniyada cinayət törədənlər təkcə həbs olunmaqla qalmayacaq, həm də ölkədən çıxarılacaqlar.
Polisin məlumatına görə, şübhəli şəxs xidmət sahəsində çalışan işçilərin birləşmiş həmkarlar ittifaqı təşkilatı (Verdi) üzvlərinin qatıldıqları yürüşün iştirakçılarını izləyərək, avtomobillə onların arxasınca hərəkət edib. O, daha sonra sürəti artırıb və avtomobili yürüş iştirakçılarının üzərinə sürüb.
Münxendə və digər şəhərlərdə planlaşdırılan aksiya və tədbirlər bu hadisə ilə əlaqədar təxirə salınıb.
**15:26

Almaniyanın Münxen şəhərində avtomobil izdihamın üzərinə sürülüb.
Senzor.az bildirir ki, bu barədə “Bild” məlumat yayıb.
Son məlumatlara görə, hadisə nəticəsində 20 nəfər xəsarət alıb. Onların arasında uşaqların da olduğu bildirilir.
İnsidenti törədən şəxs hadisə yerindəcə saxlanılıb.