Salyanda yanan yük maşınını söndürən Fövqəladə Hallar Nazirliyinin (FHN) iki əməkdaşını maşın vurub.

APA-nın məlumatına görə, səhər saatlarında Ələt-Astara avtomobil yolunun Salyan rayonunun Xıdırlı kəndi ərazisindən keçən hissəsində yanan “Ford Tranzit” markalı yük avtomobilini söndürən FHN-in Dövlət Yanğından Mühafizə Xidmətinin Salyan Yanğından Mühafizə Hissəsinin əməkdaşlarını “Ateco” markalı başqa bir yük avtomobili vurub. Nəticədə, Neftçala rayonunun Şorkənd kənd sakini, 1983-cü il təvəllüdlü Hakim Şahlar oğlu Piriyev hadisə yerində dünyasını dəyişib. Digər əməkdaş, Salyan rayonunun Xocalı kənd sakini, 1989-cu il təvəllüdlü Elşən İnsanağa oğlu Tağıyev xəstəxanaya yerləşdirilib.

Faktla bağlı araşdırma aparılır.