İran parlamentinin spikeri Məhəmməd Bağır Qalibaf ABŞ-da keçirilən aralıq seçkilərin ilkin nəticələri fonunda amerikalıların müharibəni rədd etdiyini bildirib və əlavə edib ki, Tehran bu mesajı dəstəkləyir.

Senzor.az yerli KİV-ə istinadən bildirir ki, Qalibaf “X” sosial media platformasında yazıb: “İstər vicdanın səsi, istərsə də yaşayış xərclərinin artması ilə amerikalılar müharibəyə yox dedilər və biz bu mesajı dəstəkləyirik”.

Spiker xəbərdarlıq edib ki, əgər ABŞ hökuməti Amerika xalqının bu mövqeyinə və iradəsinə xəyanət edərsə, “kabus”la qarşılaşacaq.

Bu arada, Qətər ABŞ-ın dəniz blokadası və Hörmüz boğazındakı təhlükəsizliklə bağlı gərginlik fonunda Vaşinqton ilə Tehran arasında vasitəçilik etməyə davam edir.

İran bildirib ki, vasitəçilər vasitəsilə ABŞ-la mesaj mübadiləsi aparır və boğazın yenidən açılması Vaşinqtonun blokadaya son qoymasından asılıdır.