Avqustun 14-nə keçən gecə Rusiya qoşunları Ukraynanın Odessa vilayətinə 15 pilotsuz təyyarə ilə hücum təşkil edib, səkkiz “Kalibr” tipli raket atıb.

Senzor.az yerli KİV-ə istinadən bildirir ki, Ukraynanın hava hücumundan müdafiə qüvvələri bütün hücumları dəf edib. Rusiya ordusu raketlərin bir hissəsini Odessanın mərkəzinə yönəldib. Onlar vurulub, lakin qalıqların düşməsi nəticəsində təhsil müəssisələrindən birinin yataqxanasına və supermarketə ziyan dəyib.

Bir neçə binada partlayış nəticəsində pəncərələr və eyvanlar zədələnib, yaxınlıqda dayanmış avtomobillərə ziyan dəyib.

İki yerdə yanğın baş verib. Hadisə yerində xilasedicilər yanğının söndürülməsi üçün çalışırlar.

Xatırladaq ki, Rusiya qoşunları sonuncu dəfə avqustun 2-nə keçən gecə pilotsuz təyyarələrin köməyi ilə Odessa vilayətinin cənubuna hücum etmişdi.