Bakı Şəhər Baş Polis İdarəsinin Dövlət Yol Polisi (DYP) İdarəsi yağışlı hava ilə əlaqədar sürücülərə müraciət edib.Senzor.az-ın məlumatına görə, müraciətdə sürücülərdən yollarda diqqətli olmaları xahiş edilib: “Sürücülər yağışın əmələ gətirdiyi gölməçələrdən keçərkən piyadaları nəzərə alsınlar. Bu, paytaxtımızda insanların daha çox nazarzılıq bildirdiyi məsələlərdən biridir. Artıq yay fəsli bitib, payız fəslidir. Buna görə də silgəcləri bir daha gözdən keçirsinlər. Çünki yağışlı havada görmədə məhdudiyyətin yaranması ən önəmli faktorlardan biridir. Təkərləri dəyişmək vaxtı da yaxınlaşıb. Sürüşmənin qarşısını almaq üçün nəqliyyat vasitələrinin texniki sazlıqlarına diqqət yetirsinlər. Günün pik saatlarında hərəkətdə olarkən diqqətli olsunlar, piyadaların qəfil yola çıxması halları yaşana bilər".
Müraciətdə o da bildirilir ki, hər bir sürücü hava şəraitinə uyğun olaraq hərəkət sürətini aşağı salmalıdır: “Bu barədə “Yol Hərəkəti Haqqında Qanun”da da qeyd olunub. 110 km/saat yolda vacib deyil ki, maksimum sürətdə gedilsin. Şəhərdə müəyyən yerlərdə tablo var, ancaq rayonlararası yerlərdə tablo yoxdur. Ona görə də, sürücülər bu məsələyə xüsusi diqqət etməlidirlər”.
