"Prokurorluq orqanlarına qulluğa qəbulla bağlı 2022-ci ildə keçirilmiş 24-cü müsabiqədə namizədlərin dünyagörüşünə, məntiqi düşünmə qabiliyyətinə, xarici dil biliklərinə, prokurorluqda işləmək üçün zəruri olan digər şəxsi keyfiyyətlərə malik olmaları, o cümlədən prokurorluqda qulluq keçmək arzuları və prokurorluq orqanlarında mövcud olan vakant ştat vahidləri nəzərə alınmaqla 57 gənc hüquqşünas qulluğa qəbul edilib".

Senzor.az-ın xəbərinə görə, bunu baş prokuror Kamran Əliyev prokurorluq orqanlarına qulluğa yeni qəbul olunmuş gənclərin andiçmə mərasimində deyib.

Onun sözlərinə görə, 2002-2022-ci illərdə prokurorluğa müsabiqə yolu ilə 1 151 nəfər qəbul edilib:

"Hazırda prokurorluq orqanlarında çalışan şəxslərin orta yaş həddi 43-dür. Belə ki, prokurorluq orqanlarında 21-25 yaş həddində 124 nəfər, 26-30 yaş həddində 254 nəfər, 31-35 yaş həddində 252 nəfər, 36-40 yaş həddində 215 nəfər, 41-45 yaş həddində 111 nəfər, 46-50 yaş həddində 19 nəfər, 51-55 yaş həddində 2 nəfər işləyir".

Baş Prokuror əlavə edib ki, Azərbaycanda 182 prokurorluq orqanlarının işçisinə qarşı intizam tədbirləri tətbiq edilib.