Türkiyə Böyük Millət Məclisinin (TBMM) Azərbaycanla dostluq qrupunun üzvləri Bakıya səfərə gəliblər.
Bu barədə modern.az-a Türkiyə parlament heyətinin üzvü, deputat Yunus Kılıç məlumat verib.
O, Azərbaycana səfər çərçivəsində bir sıra görüşlər keçirəcəklərini, aktual mövzular ətrafında fikir mübadiləsi aparacaqlarını bildirib:
“Məqsəd əlaqələrimizi daha yüksək səviyyədə saxlamaq, bir-birimizə dəstək olmaq, eyni zamanda birlikdə hərəkət edə biləcəyimiz sahələri müəyyənləşdirməkdir. Azərbaycan və Türkiyə iki qardaş ölkədir. Bizim uğurlarımız da, hədəflərimiz də birdir”.
Y.Kılıç 4 gün Bakıda qalacaqlarını, mümkün olsa, Şuşaya səfər edəcəklərini söyləyib: “Rəsmi görüşlərdən əlavə başqa işlərimiz də olacaq. Xüsusilə Şuşaya getmək, Qarabağı ziyarət etmək, orada yaşananaları öz gözlərimizlə görmək istərdik. Ümid edirik ki, budəfəki səfərimiz də maraqlı və faydalı olacaq”.
