Azərbaycanlı paracüdoçu Vüqar Şirinli Tokio-2020 16-cı Yay Paralimpiya Oyunlarında cüdo üzrə kişilər arasında 60 kiloqram çəki dərəcəsində qızıl medal qazanıb.
Senzor.az-ın məlumatına görə, idmançımız finalda qazaxıstanlı paracüdoçu Anuar Sarıyevi məğlub edib.
Qeyd edək ki, bu gün qadınlar arasında 48 kiloqram çəki dərəcəsində paracüdoçu Şahanə Hacıyeva və 100 metr məsafəyə arxası üstə üzmə yarışında üzgüçü Raman Saleh də qızıl medal qazanıblar.
Bundan əvvəl isə azərbaycanlı pauerliftinqçi Pərvin Məmmədov bürünc medal qazanmışdı.
Xatırladaq ki, “Tokio-2020”də ölkəmizi idmanın 6 növündə 47 kateqoriya üzrə rekord sayda - 36 idmançı təmsil edir. Atletlərimizin 24-ü kişi və 12-si qadındır. XVI Yay Paralimpiya Oyunları sentyabrın 5-dək davam edəcək.
