Milli Hidrometeorologiya Xidməti ölkədə müşahidə olunan faktiki hava ilə bağlı məlumatı açıqlayıb.Senzor.az-ın xəbərinə görə, Xidmətin rəisi Umayra Tağıyeva bildirib ki, gözlənildiyi kimi, martın ikinci ongünlüyündə əlverişsiz qeyri-sabit hava şəraiti müşahidə olunur.
O qeyd edib ki, Aralıq dənizi siklonları ilə bağlı soyuq atmosfer cəbhələrinin ölkə ərazisindən fasilələrlə keçməsi nəticəsində respublikanın əksər rayonlarında yağıntılar müşahidə olunur, dağlıq və dağətəyi rayonlarda qar yağır, düşən yağıntıların miqdarı bəzi ərazilərdə 29 mm-dir: “Nəticədə dağlıq və dağətəyi rayonlarda qar örtüyü əmələ gəlib. Qax rayonunun Sarıbaş məntəqəsində qar örtüyünün hündürlüyü 64 sm, Şahdağda 48 sm, Xaltanda 29 sm, Altıağacda 28 sm, Daşkəsəndə 21 sm olub. Havanın temperaturu çoxillik norma göstəricilərindən 2 dərəcəyə kimi aşağıdır”.
