Azərbaycan, Türkiyə və Türkmənistan liderlərinin görüşü çox mühüm addımların atılacağının təsdiqidir.

Bu barədə Türkiyə Prezidenti Rəcəb Tayyib Ərdoğan Avazada Türkmənistan Parlamenti Xalq Məsləhətinin sədri Qurbanqulu Berdiməhəmmədovla görüşü zamanı bildirib.

O qeyd edib ki, dünən üç ölkənin xarici işlər nazirlərinin Avazada baş tutan iclasında önəmli qərarlar qəbul edilib.

“İstər enerji, istər təbii qaz, istərsə də nəqliyyat sahələrində atacağımız addımlar çox böyük önəm daşıyır. Bu gün bunun nöqtəsini qoysaq, gələcəyə doğru mühüm addımlar atmış olacağıq. Türkiyə, Azərbaycan və Türkmənistanın bu Zirvə Görüşü tarixə Avaza Zirvəsi olaraq yazılacaq”, - deyə o bildirib.

Ərdoğan, həmçinin, əlavə edib ki, Türkmənistanın Türk Dövlətləri Təşkilatına tam üzv olması Təşkilatı gücləndirəcək.

Türkmənistan Parlamenti Xalq Məsləhətinin sədri Qurbanqulu Berdiməhəmmədov öz növbəsində də üçtərəfli zirvənin son dərəcə əhəmiyyətli olduğunu vurğulayıb: “Biz üç qardaş olaraq, dünyada rifah, sülh və iqtisadi inkişaf üçün səylərimizi davam etdirəcəyik. Xüsusən də, təbii qaz, elektrik enerjisi və nəqliyyat dəhlizlərinin üçtərəfli şəkildə həyata keçirilməsinə önəm veririk".(APA)

**10:45

Türkiyə Prezidenti Rəcəb Tayyib Ərdoğanla Türkmənistanın dövlət başçısı Sərdar Berdiməhəmmədov arasında görüş olub.

Senzor.az yerli KİV-ə istinadən bildirir ki, bu barədə Türkiyənin Prezident Administrasiyası məlumat yayıb.

Görüş Türkmənistanının Avaza rayonunda keçirilib.

R.T.Ərdoğan, həmçinin Türkmənistan Parlamenti Xalq Məsləhətinin sədri Qurbanqulu Berdiməhəmmədovla görüşüb. 

Xatırladaq ki, bu gün Türkmənistanda Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Türkmənistan dövlət başçısı Sərdar Berdiməhəmmədovun iştirakı ilə Birinci Üçtərəfli Zirvə Görüş keçiriləcək.

Görüşdən sonra sənədlərin imzalanması gözlənilir.