Pakistanın Bəlucistan əyalətinin Lasbela şəhərində bazarda qaz balonunun partlaması nəticəsində azı 12 nəfər ölüb, 13 nəfər yanıb.
Bu barədə Geo telekanalı məlumat yayıb.
Bildirilib ki, qaz balonu şəhərin əsas bazarındakı mağazada yanacaq doldurarkən partlayıb. Partlayış nəticəsində yaxınlıqdakı binalar, mağazalar və yaxınlıqda dayanmış iyirmiyə yaxın motosiklet zədələnib.
Lasbela polis komissarının müavini Murad Kasi jurnalistlərə bildirib ki, "Balonun partlaması nəticəsində mağazanın sahibi də daxil olmaqla ən azı 25 nəfər yanıb".
Yaralılardan 12-si müalicə zamanı dünyasını dəyişib. Həkimlərin sözlərinə görə, bir neçə yaralının vəziyyəti ağırdır, onlar bədənin 70-90%-i yanıq xəsarətləri alıblar.
Şəhər polisi hadisə ilə bağlı araşdırma aparır.(AzVision.az)
